Hér er hægt að líta yfir það helsta sem gerðist árið 2001 og var fjallað um hér á heimasíðunni.

Fundur 20. desember kl 20:00 í Garðaskóla
Síðasti félagsfundur flugmódelfélagsins Þyts á árinu 2001 verður í Garðaskóla Garðabæ fimmtudaginn 20. desember kl. 20:00. Dagskrá:
1.  Þytur komi að leigumálum varðandi smíðaaðstöðu í Hafnarfirði. Tillaga lögð fram sem hljóðar svo “Félagsfundur flugmódelfélagsins Þyts samþykkir heimild til stjórnar félagsins um að grípa inn í leigumál varðandi smíðaaðstöðu flugmódelmanna í Hafnarfirði.
2.   Hvað er öðruvísi þegar smíðuð eru stærri flugmódel? Nokkrir flugmódelsmiðir miðla af reynslu sinni um hvað þurfi að hafa í huga þegar verið er að smíða stærri flugmódel.
3. Kynntur flugmódelfundur sem verður 10. janúar (fyrsti fimmtudagsfundur á árinu 2002)
4. Önnur mál

Við hvetjum félagsmenn til að mæta. 
Stjórnin

Aðalfundur Flugmódelfélagsins Þyts haldinn 1. nóvember

31. aðalfundur Flugmódelfélagsins Þyts var haldinn í Garðaskóla fimmtudaginn 1. nóvember 2001. Í ársskýrslu Guðmundar G. Kristinssonar kom fram að mikil fjölgun nýliða hefur orðið á starfsárinu og eru um 30% félagsgjalda á árinu frá nýjum félagsmönnum. Á næstu árum þarf að undirbúa nýja staðsetningu undir flugvöll og félagsaðstöðu eftir 7-8 ár þar sem samkvæmt aðalskipulagi Hafnarfjarðar á að rísa íbúabyggð á núverandi svæði.Listflugskeppnir eru aftur komnar inn á dagskrá, en haldnir voru nokkrir kennslufundir og tvær keppnir í listflugi á árinu. Árshátíð félagsins var haldin með pomp og pragt 17. mars í vor. Nýjar öryggisreglur á Hamranesi voru samþykktar í kjölfar þeirra miklu fjölgunar félagsmanna sem orðið hefur. Guðmundur G. Kristinssson formaður kynnti í haust tvo nýja kennslubæklinga sem hann hefur þýtt frá Bandaríkjum, annan fyrir byrjendur í módelflugi og hinn fyrir leiðbeinendur í módelflugi. Lagðir voru fram reikningar félagsins og var hagnaður af rekstri ársins kr. 51529. Samþykkt var á fundinum ný útfærsla á félagsgjöldum og þau lækkuð frá því á árinu á undan. Almennt gjald verður kr. 9000, utanbæjargjald og nýliðagjald verður kr. 6000 og gjald fyrir 15 ára og yngri og félagsmenn án flugaðildar kr. 3000 á ári. Einnig var samþykkt að 67 ára og eldri greiddu kr. 3000 fyrir fulla aðild með flugheimild. Samþykkt var að setja inn viðbót í öryggisreglur: Flugmenn leitist til að botngefa ekki eða stilla mótora í"pyttinum". Drepa skal á mótor áður en komið er frá flugvelli inn í "pyttinn". Tveir í stjórn voru samkvæmt lögum lausir, Steinþór Agnarsson og Jón Erlendsson. Þeir gáfu báðir kost á sér aftur í stjórn og voru endirkjörnir með lófaklappi. Í mótanefnd voru kjörnir: Pétur Hjálmarsson formaður, Birgir Sigurðsson, Stefán Sæmundsson, Frímann Frímannsson, Hannes S. Kristinsson, Björn Elvar Sigmarsson og Ómar. Í Flugvallarnefnd voru kjörnir Jón Erlendsson formaður, Erlendur, Sigurgeir og Árni Jóhannsson. Í ritnefnd voru kjörnir Arnar B. Vignisson formaður, Guðmundur G. Kristinsson, Ágúst Bjarnason og Kristján Antonsson. Í nýliðanefnd voru kjörnir: Guðmundur G. Kristinsson formaður, Björn Elvar Sigmarsson, Erling Jóhannsson og Guðbjartur.

Bíósalur, Hótel Loftleiðir - 08/11/2001- 19:30 GT
Lokið er við að búa til myndband um flugsýninguna sem haldin var á Reykjavíkurflugvelli þann 23 ágúst 1986 og verður frumsýning þess að Hótel Loftleiðum fimmtudaginn 8 nóvember n.k. kl. 19:30. Allir flugmenn og gestir þeirra eru velkomnir meðan húsrúm leyfir, en eftir sýninguna verða veitingar og spjall að hætti flugmanna.

Vinnudagur laugardaginn  27. október
Sælir félagar. - Það er búið að setja næsta laugardag sem smá vinnudag á Hamranesi og gott væri að fá sem flesta til að hjálpa, því þá geta menn líka mætt með módelin og flogið. Það sem verður gert er meðal annars : Girðingin umhverfis völlinn, ljósavélinn, frágangur fyrir veturinn, og ýmislegt smotterí. Vonandi geta sem flestir séð sér fært að mæta og endilega gefið mér hugmynd um fjölda með því að senda póst á listann heli@islandia.is . Einnig ef þið vitið um eitthvað sem þarf að gera eða þið viljið endilega gera sjálfir, látið mig þá vita. Erlendur sendi mér fínan lista með atriðum sem ég vissi ekki um eða var búinn að gleyma, mjög gott.

Bestu kveðjur, Jón Erlends

Aðalfundur  1. nóvember í Garðaskóla kl. 20:00
31. aðalfundur Flugmódelfélagsins Þyts verður haldinn fimmtudaginn 1. nóvember 2001  
kl. 20:00 í Garðaskóla í Garðabæ.

Dagskrá aðalfundar
1. Skýrsla formanns um störf félagsins á liðnu starfsári.
2. Reikningar lagðir fram til samþykktar
3. Fjárhagsáætlun og ákvörðun félagsgjalda.
4. Skýrslur nefnda.
Kaffihlé:       
5. Kosning formanns samkvæmt ákvæðum 7.gr.
6. Kosning ritara, gjaldkera og meðstjórnenda samkvæmt ákvæðum 7.gr.
7. Kosning endurskoðenda.
8. Kosning í nefndir
9. Tillögur og lagabreytingar
10.Önnur mál
Fundarstjóri verður Kristján Antonsson  

Mikið flogið síðustu vikur og margar nýjar vélar komnar í loftið
Undanfarnar tvær vikur hefur verið flogið nánast alla daga í bíðskaparveðri. Þetta hófst sunnudaginn 13. október og í vikunni þar á eftir var flogið flesta virka daga. Um helgina 20.-21. október var svo mikið flogið að báðadagana voru stanslaust 2-5 vélar í loftinu og oft biðröð í lendingar og flugtök. Margir komu með sínar gömlu vélar, aðrir með nýjar/gamlar frá öðrum og enn aðrir með nýjar vélar. Ein sú nýjasta er PT 19 sem Sigurgeir fjárfesti nýlega í og er gríðarlega falleg í loftinu. Friðrik hefur flogið nýrri og fallegri Extru með Zenoa 38 og einnig Giles með 150 fjórgengismótor, Guðmundur G.Kristinsson setti Champion með 46 mótor í loftið (vélim sem krassaði fyrir tveimur árum), Skjöldur mætti loksins með Ryan og er hún ein fallegasta vélin í loftinu sem sét hefur í sumar og Marteinn og Róbert settu tvo nýja Piper Cub með 46 mótor í lofti og eru farnir að fljúga án aðstoðar og gengur vel. Sigurður Kristjánsson hefur verið að fljúga Majestic sem er gríðarlega falleg listflugvél og hann er sá eini sem sést hefur fljúga rúllandi hring með tilþrifum.

Um 40 manns mætti á fyrsta félagsfund vetrarins 
Mjög margir voru mættir á þennan fyrsta fund vetrarins. Í nýliðakennslu lagði Guðmundur G. Kristinsson fram tvo nýja kennslubæklinga sem hann hefur þýtt frá Bandaríkunum. Þetta er annarsvegar Leiðbeiningar fyrir byrjendur í módelflugi og hins vegar Leiðbeiningar fyrir kennara í módelflugi. Þessir bæklingar verða seldir hjá Þresti á vegum Þyts og var þessu framtaki  vel tekið. Ákveðið var að koma upp 8-10 manna hópi kennara í módelflugi fyrir næsta vor. Mikið var rætt um öryggismál á Hamranesi og samþykktar voru nokkrar breytingar á öryggisreglum varðandi flug á Hamranesi. Stærsta breytingin  er líklega sú að hætta að nota rauðu þríhyrningana á tíðnitöflunni og flugmenn framvegis klemmi sín félagsskýrteini á viðkomndi tíðnipinna. Taka þarf tíðnitöfluna og endurbæta og setja upp á hana öryggisreglur og skillti sem banni gestum að fara inn á flugsvæði. Athuga þarf með lausn á flugi gesta á svæðinu. Héðan í frá er stranglega bannað að fljúga nema skýrteini viðkamndi flugmanns sé á töflunni. Samþykkt var að færa stöðvunarlínu á aðkeyrslubraut aftar. Ágúst kynnti niðurstöður fundar með skipulagsstjóra Hafnarfjarðarbæjar og við höfum okkar svæði líklega aðeins 5-8 ára og verðum því að fara að leita að öðrum stað. Lögð var inn beiðni um að fá svæði rétt sunnan við núverandi svæði. Kristján kynnti lækkun á gjaldi til Flugmálafélags Íslands úr kr. 750 í kr. 500 afturvirkt um tvö ár. Þytur er því búinn að greiða fyrir næstu tvö ár. Björgúlfur gefur ekki kost á sér aftur sem fulltrúi flugmódelmanna hjá FMÍ og verðum á aðalfundi að finna nýjan fulltrúa í samráði við Flugmódelfélag Akureyrar. Vel var tekið í tillögur um lækkun félagsgjalda í kr. 9000 á ári, utanbæjargjald kr. 6000 á ári og aðild án flugleyfis kr. 3000 á ári. Flestir töldu að malbika þyrfti flugbrautir áður en fari væri að eyða peningum í rafmagn í flugstöð. Tveir fulltrúar eru lausir í stjórnarkjöri á aðalfundi sem verður þann 1. nóvember n.k. Hugmyndir um fræðslu á vetrarfundum voru t.d. fjarstýringar (PPC, PCM, ABC, Dual Conversion og fl.), frágangur stjórntækja og mótórs í stærri módelum, módelfund (allir komi með módel), rafmagnsflugvélar, þyrlur og fá gesti eins og Magnús Norðdal, flugmálastjóra, svifflugmen eða aðra.

Fyrsti félagsfundur vetrarins verður fimmtudaginn 4. október kl. 20:00 í Garðaskóla Garðabæ
Vetrarstarfið fer nú af stað og fyrsti fundur vetrarins verður í Garðaskóla fimmtudaginn 4. október kl. 20:00. Fjallað verður um fjölbreytt málefni og m.a. þær áherslur sem félagsmenn vilja leggja varðandi vetrarstarfið framundan. Á dagskrá er nýliðakennsla, öryggismál á Hamranesi, skipulagsmál félgssvæðis, lækkun félagsgjalda, rafmagn í flugstöð, breytingar varðandi Flugmálafélagið, dagskrá vetrarstarfsins og önnur mál. Félagsmenn eru hvattir til að mæta og leggja grunn að öflugu starfi félagsins í vetur. 

Mikil aukning félagsmanna í flugmódelinu Þyti 2001
Á fyrsta stjórnarfundi vetrarins var farið yfir lista félagsmanna í Þyti og kom í ljós að nýir félagsmenn sem greitt hafa félagsgjald á þessu ári eru 21 og eru þeir um 30% þeirra sem greitt hafa félagsgjald á árinu. Hlutfall af heildartölu félagsmanna er um 21% þvi að 96 félagsmenn eru skráðir þegar félagsmenn sem greiddu félagsgjald fyrrifram fyrir um 10 árum eru taldir með. Á myndinni hér að ofan má sjá tvo unga flugmenn, Róbert og Martein sem lokið hafa flugþjálfun hjá Þyti og eru báðir komnir með Piper Cup í loftið. Þessar vélar hafa þeir smíðað frá grunni.Við óskum þessum ungu athafnamönnum til hamingju með þessar fallegu vélar.

Eitt glæsilegasta Piper Cup mót frá upphafi 
Piper Cup mót II árið 2001 var haldið á Hamranesi sunnudaginn 2. september. Mikill fjöldi Piper Cup véla var á staðnum og margir gestir mættu til að njóta dagsins. Pétur Hjálmarsson hafði veg og vanda af þessu móti og sýndi tilþrif í mótshaldinu eins og hans er von og vísa. Nokkuð var um að vandamál væri með mótora, en allar vélarnar fóru í loftið og allar komu heilar niður nema ein. Pétur mótsstjóri er alltaf með óvæntar uppákomur þegar hann flýgur Piper Cup (hver man ekki krassið aftur á bak eða sjálfvirka sleppibúnaðinn á hjólunum) og í þetta skiptið tók flugmaðurinn í vélinni hans völdin og renndi sér og sínum Piper inn í garðinn við flugstöðina. Eftir að hefðbundnu mótahaldi lauk kom Skjöldur með Mustanginn sinn stóra og setti mótórinn í gang. Þetta er 3W 80 tveggja strokka línumótor sem skilar hátt í átta hestöflum. Hljóðið í mótornum var einstaklega ljúft og fallegt og Mustanginn tók sig vel út þegar honum var taxerað á brautinni. Það verður gaman þegar við sjáum þessa glæsilegu flugvél fljúga. 

Piper Cup mót frestast til sunnudags 2. september kl. 10:00
Vegna veðurs frestast Piper Cuup mót II um einn dag eða til sunnudagsins 2. september kl. 10:00. Menn eru kvattir til að mæta með vélar eða til að horfa á.

Fundað varðandi skipulagsmál á Hamranesi
Þriðjudaginn 28. ágúst fóru Guðmundur G. Kristinson, Böðvar Guðmundsson og Ágúst Bjarnason á fund með skipulagsyfirvöldum í Hafnarfirði. Þar var rætt um okkar stöðu með flugvöllinn á Hamranesi og hugsanlegar breytingar á staðsetningu í framtíðinni. Verið er að vinna aðalskipulag fyrir svæðið sem verður líklega tilbúið fyrir áramót. Við lýstum vilja til að vera með okkar starfsemi á Hamranesi eins lengi og kostur væri og ef við þyrftum að fara, að okkur yrði þá úthlutað nýtt svæði sem næst Hamranesi (líklega aðeins sunnar í hrauninu). Einnig gerðum við athugasemdir við hæðina vestan við svæðið okkar í dag sem verulega hefur hækkað á undanförnum árum og "tippinn" fyrir hrossaskítinn vestan við okkur. Við spurðumst fyrir um þann möguleika að fá rafmagn á Hamranes og var okkur vísað á Orkuveutu Suðurnesja í þeim efnum. Við treystum því að Hafnarfjarðarbær verði okkur innan handar með allar breytingar varðandi svæðið okkar og að við verðum settir í forgang með nýtt svæði á undan nýjum aðilum sem ekki hafa verið með aðstöðu í hrauninu. Hafnarfjarðarbær hefur reynst okkur vel og gert mikið fyrir okkur í gegnum árin.

Flugreglur á Hamranesi ekki virtar - öryggismál þarf að bæta 
Það hefur komið fyrir nokkrum sinnum í sumar að skapast hefur hættuástand þegar verið er að fljúga á Hamranesi. Það er að mestu sömu aðilar sem hafa flogið þar síðasta áratug og þeir skapað sér ákveðnar umgengnisreglur sem allir voru sáttir við, en síðustu árin hefur fjölgað verulega nýjum aðilum og þegar þetta er skrifað eru tíu manns að bíða eftir flugkennslu og nokkrir að læra á eigin vegum. Stutt er síðan ein kennsluvél félagsins brotlenti vegna þess að nýr aðili sem ekki hafði greitt félagsgjald kveikti á sendi ofan í hennar tíðni á flugi. Flugmenn hafa lent á móti vélum sem eru að taxera og öfugt, vélar hafa verið teknar inn til lendingar meðan fólk er á brautinni, flugmenn standa ekki saman og eru jafnvel á sitt hvorum vellinu. Mönnum hefur sinnast vegna þessarar umgengni sem ekki væri ef allir færu eftir þeim reglum sem gilda og hanga upp á vegg inn í flugstöðvarhúsinu. Við þurfum að finna aðra útfærslu á tíðnitöflunni þar sem fram koma líka upplýsingar um hver sé að fljúga (ekki bara að tíðni sé upptekin). 

Piper Cup mót II verður laugardaginn 1. september kl. 10:00 
Formaður mótanefndar og mótsstjóri Piper Cup móta síðustu ára hefur ákveðið að verða með Piper Cup mót II laugardaginn 1. september kl. 10:00. Þær fréttir hafa borist að margir Piperar séu við það að komast í loftið og reiknað er með að 11 eða fleiri vélar muni verða á þessu síðasta móti sumarsins. Allir sem eiga Piper Cup eru hvattir til að mæta og fljúga á þessu móti.

Skemmtilegt listflugmót
Síðasta listflugskeppni sumarsins var haldin á Hamranesflugvelli sunnudaginn 26. ágúst kl. 10:00. Mótið var vel sótt og keppendur voru fimm talsins. Fjórir kepptu í byrjendaflokki, en aðeins einn keppandi tilkynnti.þáttöku í Keppnisflokki I. Mótsstjórinn Birgir Sigurðsson sá um að allt færi vel fram og samkvæmt reglum. Í byrjendaflokki varð Björn Sigurðsson í 1. sæti, Guðjón Halldórsson í 2. sæti og Rafn Thorarensen í 3. sæti, en aðeins munaði tveimur stigum á honum og Guðmundi G. Kristinssyni sem varð í fjórða sæti. Stefán Sæmundsson keppti einn í Keppnisflokki I, en þetta er í fyrsta skipti sem þetta flugkerfi er flogið í keppni hér á landi. Það hefur verið gaman að sjá hversu margir hafa mætt til að fylgjast með listflugskeppnum sumarsins, en aftur sorglegt hversu fáir hafa tekið þátt í þeim. Til að þessar keppnir verði að föstum lið hjá okkur verða fleiri að taka þátt og menn að æfa sig betur undir keppnirnar. Með því að æfa samkvæmt áætlum ákveðna hluti og bæta síðan við jafnt og þétt erfiðari æfingum eru flugmenn að bæta sína flugkunnáttu og þessar keppnir ættu síðan að sýna hvar hver og einn stendur. Því miður virðist áhugi fyrir aukinni flugtækni félagsmanna vera takmarkaður og kannski menn séu bara sáttir við að geta tekið upp, flogið umferðarhrig og lent. 

Síðasta listflugmót sumarsins verður á Hamranesi sunnudaginn 26. ágúst kl. 10:00
Lokakeppni sumarsins í listflugi verður haldin á Hamranesflugvelli sunnudaginn 26. ágúst kl. 10:00. Spáin er góð og ættu allir áhugasamir að fara að taka fram vélina sína og æfa prógrammið á laugardeginum. Við hvetjum félagsmenn til að taka þátt í þessari léttu og skemmtilegu keppni sem allir með lágmarksfluggetu geta tekið þátt í. Eftir keppni verður upplagt að halda áfram að fljúga því allt stefnir í frábært flugveður á sunnudaginn.

Kirkjumálið upplýst
Eins og margir hafa séð, þá er komin þessi veglega kirkjubygging við hlið norðvestur/suðausturbrautar á Hamranesi. Við hlið hennar er skilti með áletrun um að hún sé til minningar um flugvélar og áhafnir sem farist hafa á Hamranesflugvelli. Mikil umræða hefur verið í gangi um það hver kirkjusmiðurinn sé, en á skiltinu var undirritunin "Yfirkennari". Þetta mál hefur verið upplýst þar sem Bjössi "yfirkennari" hefur viðurkennt að hafa sett upp kirkjuna, en hann smíðaðai hana á sínum "yngri árum". Samþykkt hefur verið að þessi kirkja komi til með að þjóna Hamranessókn og Pétur Hjálmarsson hefur verið settur í embætti sem sóknarprestur. Þeir sem óska blessunar á nýjum vélum eða jarðarfarar eftir flugslys er bennt á að hafa samband við hinn nýskipaða prest í síma 8971007.

Vel heppnað Piper Cup mót
Langt er síðan jafn margir hafa komið á Hamranes og var á Piper Cup móti Péturs Hjálmarssonar. Pétur og Reynir flugu samflug, Erlendur dansaði vals með sínum skemmtilega Piper, Jóhannes bræður mættu með nokkra Pipera sem teknir voru af Internetinu og nýr Piper í herlitum frá Selfossi fór jómfrúarflugið. Erlendur sá um að allir fengu kaffi og var glatt á hjalla í flugstöðinni. Mótsstjórinn átti þó uppákomu kvöldsins þegar hann á 1/4 Piper Cup setti hjólin niður í veginn úti við hlið og missti þau undan vélinni, en flaug síðan hjólalaus inn á flötina og magalenti þar án skemmda. það er með ólíkindum hvað hann er lánssamur hann Pétur, en allir muna líklega eftir þotulendingu hans í blindflugi fyrir nokkrum árum. 

Piper Cup mót þriðjudaginn 14. ágúst kl. 19:00 
Árlegt Piper Cup mót í umsjón Péturs Hjálmarssonar verður haldið með pomp og pragt þriðjudaginn 14. ágúst kl. 19:00 Félagsmenn eru hvattir til að mæta með allar gular vélar og skemmta sér og öðrum.

Frábær módelflugkoma Flugmódelfélags Akureyrar 
Árleg flugkoma FMFA helgina eftir Verslunarmannahelgi tóks frábærlega og var vel sótt af módelmönnum og gestum. Talið er að yfir 60 módel hafi verið á staðnum og um eða yfir 100 manns í kringum þau. Mörg hundruð manns komu síðan til að fylgjast með og upplifa stemmninguna. Rigning setti strik í reikninginn, en henni létti sem betur fer og var þá hægt að fljúga. Félagar í FMFA eiga heiður skilið fyrir að standa árlega fyrir einni stærstu hátíð flugmódelmanna á hverju ári. Grillmaturinn var ljúffengur og menn tóku lagið fram eftir nóttu. Kærar þakkir til ykkar fyrir norðan. Þú getur séð myndir frá helginni með því að smella hér.

Helgina 11. - 12. ágúst verður árleg módelflugkoma Flugmódelfélags Akureyrar haldin á Melgerðismelum í Eyjafjarðarsveit.
Svæðið verður opnað fyrir umferð föstudaginn 10. og flug hefst síðan kl. 9:00 á laugardagsmorguninn. Sendagæsla verður á svæðinu og hefur Skjöldur Sigurðsson frá Flugmódelfélaginu Þyt góðfúslega tekið að sér tíðnistjórnun á vellinum ásamt félögum úr Flugmódelfélagi Akureyrar. Umferð um veginn við flugbrautarendann verður stjórnað svo að ekki trufli flugtök eða lendingar. Kl. 18:00 verður kveikt upp í grillinu og vel útilátnar grillmáltíðir seldar á kr. 1000. Góð aðstaða er við Flugstöð Þórunnar Hyrnu fyrir tjöld og  tjaldvagna. Salernisaðstaða ásamt heitu og köldu vatni er í flugstöðinni. Undanfarin ár hafa margir gist á svæðinu og góður andi svifið yfir vötnum. Allt áhugafólk um flugmódel er hvatt til að mæta á þennan viðburð, kynnast öðru módelfólki og huga að því nýjasta sem er að gerast í sportinu.  Ef óskað er nánari upplýsinga er bent á eftirtalda: Árni Hrólfur Helgason símar 462 5962 - 867 3923, Kjartan Guðmundsson símar 462 5220 - 460 7650 - 898 5235, Björn Sigmundsson símar 462 3243 - 895 0843 og Þorsteinn Eiríksson sími 463 1104

Með kveðju, Árni Hrólfur Helgason, formaður Flugmódelfélags Akureyrar

Úrslit í Listflugskeppni 24. júlí
Listflugskeppni II var haldin í miklum hliðarvindi þriðjudaginn 24. júní. Birgir Sigurðsson mótsstjóri stjórnaði keppninni með myndarbrag og hafði þrjá dómara (Jón V. Pétursson, Stefán Sæmundsson og Skjöld Sigurðsson) ásamt aðstoðarmanni sér til halds og trausts (Kristján Antonsson). Aðeins þrír keppendur tóku þátt (Steven, Reynir og Guðmundur G. Kr.), en mikill fjöldi manns fylgdist með keppninni. Farnar voru þrjár umferðir og kláruðu Steven og Reynir þær allar, en Guðmundur braut skrúfu í lendingu eftir fyrstu umferð. Mjög mjótt var á milli Steven og Reynis í stigum, en Steven hafnaði í fyrsta sæti, Reynir í öðru sæti og Guðmundur rak lestina með þriðja sætið. Mótsstjóri lagði eftir keppnina áherslu á að menn æfðu sig fyrir þriðja og síðasta mótið í sumar og fjölmenntu til þátttöku.

Listflugskeppni frestað til þriðjudagsins 24. júlí kl. 19:00
Vegna veðurs og veðurspár fyrir vikuna 16-23 júlí er listflugskeppni sem átti að vera miðvikudag 18. júlí frestað til þriðjudagsins 24. júlí kl. 19:00. Nánari upplýsingar í næstu viku verða á símsvara félagsins 562 2910.

Eitt símtal og ótrúlegt upplýsingaflæði fór af stað
Undirritaður Guðmundur G. Kristinsson átti fróðlegt símtal við Ágúst Bjarnason um hrekki í Kyosho Cap 232 og fékk hjá honum upplýsingar um stillingar á hallastýrum til að losna við hrekki í vélinni. Bjössi er með eins vél og er þegar búinn að prófa þetta og virkaði það vel. Undirritaður á eftir að prófa sinn Cap eftir breytingar á stillingum, en fimmtudaginn 19. júlí setti Ágúst þetta málefni á póstlistann og viðbrögðin voru ótrúleg. Það komu fram upplýsingar frá fjölda aðila um þetta málefni og eiga þær eftir að hjálpa mörgum til að komast hjá erfiðleikum með nýjar vélar í framtíðinni. Þetta er eitt besta dæmið sem ég hef séð um þann gríðarlega fróðleik sem býr hjá okkar félagsmönnum. Hafið bestu þakkir og haldið áfram að koma slíkum upplýsingum á framfæri. Hér að neðan má sjá allar þessar upplýsingar teknar saman.

______________________________________________

"Meira upp en niður" Sælir , Nýlega var félagi að kvarta yrir því, að Kyosho Cap 232 væri leiðinlegur á flugi og léti illa að stjórn. Ég kannaðist ekki við þetta, því mín vél flýgur einstaklega vel, og hefur enga tilhneigingu til að ofrísa út á annan vænginn í beygju, eins og Cap félaga okkar. Sjálfur lenti ég í svipuðu fyrir mörgum árum þegar ég flaug Ultra-Hot fyrst Hann átti það til að falla út á vænginn, sem er utar í beygju. Ég breytti aðeins hallastýrunum, þannig að þau færast um tvöfalt meira upp en niður, og eftir það var Ultra-Hot ljúf eins og lamb. Ég er einnig með svona "aileron differential" á minni Kyosho Cap 232, sem einnig flýgur eins og lamb (allir hafa auðvitað séð lamb fljúga :-). Það er auðvelt að gera þetta, annað hvort með því að forrita fjarstýringuna, ef hún býður upp á það,  eða þá með því að breyta aðeins stöðu armsins á servóinu, þannig að armurinn vísi um 30° frá miðju, þegar hallastýrið er í miðstöðu. Fyrirbærið, sem veldur þessari slæmu hegðun, er kallað "adverse yaw". Það stafar af því að loftmótstaðan (drag) á vænginn, þar sem hallastýrið fer niður, er mun meiri en loftmótstaðan á vænginn þar sem hallastýrið fer upp. Þetta gerir það að verkum, að flugvélin geigar frá réttri stefnu, en það kallast "yaw". Ef við ætlum t.d. að beygja til vinstri, þá fer hægra hallastýrið niður, loftmótstaðan verður meiri hægra megin, og vélin snýst aðeins til hægri, í stað þess að snúast til vinstri.  Með því að beita hliðarstýrinu einnig til vinstri ásamt hallastýrunum er hægt að komast hjá þessu, en þá þurfum við að samhæfa hreyfingarnar vel. Einfaldari lausn er að hafa "meira upp en niður" í hreyfingu hallastýrisins. Ég átti fyrir langa löngu Robbe Piper Cub 1:5. Hann vildi ekki beygja nema hliðarstýri væri einnig notað. Eftir að hallastýri var breytt varð vélin mun þægilegri. Svona "aileron differential" virkar auðvitað öfugt þegar flogið er á hvolfi, en við erum alls ekki alltaf að fljúga þannig, og þegar við gerum það, þá erum við yfirleitt í beinu flugi. Hve mikinn mismun á upp og niður þarf að nota? það fer auðvitað eftir flugvélategund. Það mætti t.d. prófa tvöfalt meiri hreyfingu upp en niður til að byrja með (50% differential), og sjá svo til og auka mismuninn eða minnka eftir reynsluflug.

  Kveðja , Ágúst

  Ég hef reynslu af því að nota "dffrential", aðallega úr sviffluginu. Svifflug er næstum óhugsandi án þess.  Í ljós kom á 3 metra vélinni minni að ekki var nóg að nota "diffrential".  Hún fór ekki að beygja almennilega fyrr en ég var auk þess búinn að "mixa" 30 % rödder með og þvílíkur munur, sérstaklega á lítilli ferð í stórum beygjum.

  Guðjón 

  Sælir flugmenn, Þessi umræða um hallastýri og hliðarstýri er býsna fróðleg. Flugmenn sem fljúga eingöngu 1/1 flugvélum í fullri stærð, læra að samhæfa beygjur með halla- og hliðastýri þannig að flugvélin fljúgi "rétt". Þannig finnst ekki að flugvélin hallast, heldur eykst bara eigin þyngd vegna miðflóttaaflsins í beygju. Svo er líka kennt að beita stýrunum öfugt þegar lent er í hliðarvindi; vélinni hallað í áttina að vindinum en hliðarstýrið sett í hina áttina til að flugvélin haldi brautarstefnunni. Fáir módelflugmenn ná góðum tökum á þessum tveim aðferðum, (undirritaður þar meðtalinn) en nýju fjarstýringarnar gefa mjög góðan möguleika á að samtengja stýri til að samhæfa beygjur með halla- og hliðarstýri eins og Ágúst og Guðjón minnast á.

  Listflug. Þeir sem vilja líka fljúga listflug, geta forritað sérstakan takka á stýringunni til að velja hvort þessi samtenging er virk eða ekki, samtengd stýri henta sem sagt ekki fyrir allar æfingar.

  Mikil vænghleðsla. Ég hef verið í vanda með frekar þung módel, og mér hefur reynst vel að láta hallastýrin hreyfast meira upp en niður, en til viðbótar hef ég forritað í takka á stýringunni til að geta stillt bæði hallastýrin örlítið upp til að fyrirbyggja að vélin falli óvænt á annan vænginn í lendingu. Þetta hefur líka þann kost að þegar hraðinn minnkar leitar nefið ekki eins mikið niður, það virkar eins og upp-trimm. Þanning býr maður til eins konar "wash-out" á vænginn fyrir lendingu, sem annars hentar ekki í venjulegu flugi.

Frá NASA Auk þess fann ég aðferð sem notuð er hjá NASA til að fá meiri burð í væng sem hefur mikla hleðslu. Það er einfalt, afturbrún vængsins er einfaldlega skorin af þannig að ca. 6mm flatur kantur myndast aftan á vængnum. Rafn Thorarensen hafði reyndar gert þetta með góðum árangri á Extra-Coke flugvélinni sálugu, en hvort þeir hjá NASA fréttu þetta hjá Rafni eins og ég, læt ég ósagt,  en það svín-virkar. Við módelflugmenn pælum miklu meira í flugeðisfræði heldur en aðrir flugmenn held ég, sennilega vegna þess að við höfum efni á að smíða og prófa hluti án þess að það sé lífshættulegt. "Góð lending er þegar flugmaðurinn gengur óstuddur í burtu ! " Skyldi þetta máltæki líka eiga við okkur módelflugmenn  ???

Sumarkveðja m Stefán

  Sælir félagar. Ég er sammála Stefáni með þessar pælingar á okkur módelmönnum v. flugmenn. Ég hef notað þessar aðferðir með góðum árangri, en aldrei 50% diff. á listflugvél. Þar er algengt 7 til 12% diff. En á Moth'inum mínum er það í botni og veitir ekki af, (á vélinni í fullri stærð er það: upp=22", niður=8") Góð aðferð til að stilla þetta er að klifra upp í 45° bratta og velta 1/2 veltu yfir á bakið og athuga hvort vélin hefur breytt um stefnu.

1). Velja góðann dag (helst logn)     2). Fljúa beint út frá sér þ.e. horfa á eftir vélinni.     3). Hala í hæðarstýrið og klifra 45°, sleppa pinnanum.     4). Velta 1/2 vinstri veltu, sleppa pinnanum.

  Vélin stefnir til hægri. Auka diff.     Vélin stefnir til vinstri. Minka diff.     Vélin er í óbreyttri stefnu. Til hamingu.

Með von um farsælar lendingar. Bjöggi

Listflugskeppni verður miðvikudaginn 18. júlí kl. 19:00
Á mótaskrá félagsins er listflugskeppni miðvikudaginn 18. júlí kl. 19:00. Keppt verður í flokki byrjenda og flokki I ef að fjöldi þátttakenda verður nægur. Listflugsprógrömmin sem verða flogin er hægt að nálgast á heimasíðu félagsins  http://www.thytur.is/listflug.pdf og upplýsingar um einkunnargjöf og dómgæslu er hægt að nálgast undir http://www.thytur.is/LISTFLU2.pdf  Ef að veðrið verður ekki í lagi þá verður keppni frestað fram á fimmtudag 19. júlí kl. 19:00. Hægt verður að fylgjast með nánari upplýsingum á símsvara félagsins 562 2910.

Þyrlur, rafmagnsvélar og flugkennsla
Það var gaman að sjá fjölbreytnina í fluginu einn daginn á Hamranesi. Sigurður var að fljúga þyrlunni, Ágúst með rafmagnssvifflugu, Bjössi  var að kenna módelflug og nokkrir aðrir að fljúga hefðbundnum módelum. Myndirnar sem fylgja hér með segja meira en nokkur orð.

Íslandsmeistaramótið í F3F og F3B verður helgina 30/ 6 - 1/7
Íslandsmeistaramót í F3F og F3B verður haldið helgina 30/6 - 1/7. Þá er komið að því um næstu helgi. Líklegasti mótsstaðurinn er Gunnarsholt. Sami staður og á síðasta ári. Stefnt er að því að mótið hefjist kl 10:00 á laugardags morgni. Búast má við að einhverjir fari austur á föstudags kvöldi og gisti í tjaldi. Það var ágætis stemming á tjaldstæðinu í fyrra. Nú er það svo að mót sem þetta er samsett af þremur mismunandi hópum, starfsmönnum, keppendum og áhorfendum. Stundum hefur reynst erfitt að fá nægilega marga starfsmenn og því er lýst eftir þeim. Þeir sem hafa áhuga á mótinu og vilja taka þátt, sem keppendur, starfsmenn eða áhorfendur geta verið í sambandi við Frímann í síma 899 5052 eða Guðjón 8964816. Mót sem þetta er að sjálsögðu háð veðri og gæti staðsettning og tími breytst og er þá gott að hafa hugmynd um hverjir hafi hugsað sér þáttöku.

Jónsmessumótið verður helgina 22.-24. júní
Flugmódelfélag Akureyrar hefur haldið flughelgi í ágúst árum saman þar sem fjölskyldur módelmanna koma saman og gera sér glaðan dag. Nú ætlum við hjá Þyti að gera Jónsmessuna að árlegri flugkomu í svipuðum stíl og fyrsta flugkoman verður helgina 22.-24. júní að Klaustri á Suðurlandi. Þar geta menn mætt með sínar flugvélar, fjölskyldu, tjaldið og góða skapið strax á föstudegi ef menn vilja. Ekki er fyrirhugað að hafa fasta dagskrá, en hugsanlega að grilla saman í hlöðunni. Ef ykkur vantar pláss í gistingu þarf að hafa samband við Björgúlf í síma 899 5792.

Lendingarkeppnin tókst vel
Árleg lendingarkeppni í umsjón Björns var haldin fimmtudagskvöldið 14. júní. Þátttaka var góð og keppendur á öllum aldri. Dómarar voru Steinþór, Ágúst og Björn og héldu þeir til á stólum við brautarendann í næstum tvo klukkutíma. Guðjón varð í fysta sæti með vægast sagt óvenjulega flugvél með sprungið afturdekk. Í öðru sæti varð Arnar og Pétur Hjálmarsson náði í þriðja sætið. Margir komu til að fylgjast með keppninni og haldið var áfram að fljúga eftir að keppni var lokið.

Völlurinn á Hamranesi tekinn í gegn
Margir mættu á miðvikudaginn 13. júní eftir hvatningu vallarmanna um að taka til hendinni við flugvöllinn okkar á Hamranesi. Allir graskantar voru snyrtir og síðan þjappaðir niður með bílum og dráttarvélinni okkar góðu. Einnig náðist að slétta vel völlinn og ná niður nokkrum hólum sem voru þar komnir. Það var góð stemmning í hópnum og gaman að sjá hversu menn eru tilbúnir að vinna vel saman að því að bæta okkar aðstöðu á Hamranesi.

Frábært mánudagskvöld á Hamranesi
Mikill fjöldi véla var í loftinu á mánudagskvöldinu 11. júní. Sigugeir með Þyrluna, Karl Hamilton með Giles, Guðmundur formaður með Magnum, Ágúst með Capinn, Júlíus með Super Star, Steven með Ultra Sport og Limpo daneser, Björn með Sukoi og margir fleiri. Veðrið lék við flugmenn og áhugasama áhorfendur sem voru margir. 

Afmælismót Þyts heppnaðist vel
Pétur Hjálmarsson hafði umsjón með afmælismóti Þyts 2001 og var vel mætt á staðinn og menn gerðu sér skemmtilegan dag. Listflugið var í hávegum haft og sást til margra sem voru greinilega að æfa sig samkvæmt nýju listflugferlunum. Jón V. Pétursson setti nýjan Ultimate í loftið. Steven sem er höfundur listflugferla Þyts (byrjendur og keppnisflokkur I) flaug skemmtilegt listflug og var greinilega með þetta allt á hreinu. Pétur Hjálmarsson sást sveifla vídeóvélinni af miklum móð þegar Steven var að fljúga.

Mótsstjórn ákveður breytingar á listflugsdagskrá sumarsins
Greinilegt er að áhugi á listflugi er mikill, en margir flugmenn sem virðast telja sig enn ekki hafa þá kunnáttu sem þarf til að taka þátt í móti. Þessi fyrsta uppákoma í listflugi sem var fimmtudaginn 7. júní sýndi þetta með góðri mætingu, en fáum aðilum til að taka þátt í mótinu sjálfu. Samkvæmt tillögu Birgis mótsstjóra hefur mótsstjórn tekið ákvörðun um að halda ekki fyrsta mótið aftur (sem frestað var til fimmtudags 7. júní og breytt í listflugkennslu) bjóða fram aðstoð og kennslu til þeirra sem þess óska og þurfa aðilar bara að hafa samband við einhvern í mótsstjórn (Birgir Sigurðsson, sími 5532752, Jón V. Pétursson, sími 8957380 og Guðmundur G. Kristinsson, sími 8931701). Næsta listflugmót verður síðan haldið 18. júlí. Við hvetjum áhugasaman aðila til að hafa samband við mótsstjórn ef aðstoðar er þörf og flugferlana er hægt að nálgast á heimasíðu Þyts http://www.thytur.is undir fróðleikur. 

Fyrsta listflugmótinu fimmtudaginn 7. júní var breytt í listflugskennslu
Mikil mæting var á fyrsta listflugsmót sumarsins eða 25-30 manns. Ekki voru allir með flugvélar og menn líklega ragir við að mæta beint í listflugsmót þar sem lítið hefur verið hægt að fljúga. Einnig var nokkur vindur og skítakuldi. Samkvæmt tillögu frá Birgi mótsstjóra var ákveðið að fara yfir báða listflugsferlana inn í húsi og fá síðan Jón V. Pétursson til að fljúga þann fyrri og Böðvar Guðmundsson þann seinni. Eftir góða yfirferð á ferlunum var ákveðið að breyta einum þætti í byrjendaflokki sem var Humpti bump í 1/2 kúbanska áttu (fljúga 45° upp, velta 180° og taka vélina síðan á hvolfi í mjúkan hring niður á neðri flughæð). Þegar skoðun á flugferlum var lokið var grillið hitað og boðið upp á grillaðara pylsur og kartöflusalat á meðan Jón og Böðvar gerðu flugklárt. Þeir flugu síðan báða ferlana og Björgúlfur lýsti fyrir hópnum hvað væri í gangi í loftinu. Eftir þetta tóku aðrir upp sínar vélar og eins og sést á myndunum með þessari grein var nokkuð af vélum á staðnum þrátt fyrir kulda og vind. 

Listflugmóti frestað til morguns, fimmtudagsins 7. júní kl. 19:00
Þar sem vetrarveðrið er enn að hrella okkur með vindi og kulda, verður að fresta fyrirhuguðu listflugsmóti um einn dag. Spáin fyrir fimmtudag er góð og margir hafa nú þegar skráð sig til þátttöku. Munið eftir grillveislunni og gestunum.

Listflugmót og grillveisla miðvikudaginn 6. júní kl. 19:00
Miðvikudaginn 6. júní kl. 19:00 verður listflugkoma þar sem fer fram listflugkennsla,. listflugmót og grillveisla. Mótsstjóri er Birgir Sigurðsson og með honum í mótsstjórn eru Jón V. Pétursson og Guðmundur G. Kristinsson. Dagskráin er þannig að fyrst flýgur reyndur listflugmaður nýtt byrjendaprógramm sem Steven Altherton hefur hannað, eftir það fljúga þátttakendur prógrammið með reyndum aðstoðarmanni sem talar viðkomandi í gegnum prógrammið á hans eigin vél. Eftir þetta fljúga þátttakendur sjálfir prógrammið og dómnefnd gefur stig fyrir flugið. Að þessu loknu verður keppt í keppnisflokki I fyrir reyndari flugmenn og þátttakendur í byrjendaflokki dæma þeirra flug. Samhliða þessu geta keppnisaðilar og gestir fengið sér pylsur af grillinu og kartöflusalat ásamt drykkjarföngum gegn vægu gjaldi. Við hvetjum félagsmenn til að taka þátt í flugkomunni og taka með sér fjölskylduna og gesti. Varadagur vegna veðurs er fimmtudagur og síðan eftir það þriðjudagur, miðvikudagur og fimmtudagur í næstu viku ef þarf. Upplýsingar um þetta verða á símsvara félagsins 5622910. Hægt er að skoða flugferla og fá nánari upplýsingar á http://www.thytur.is/listflug.pdf eða smella hér.

Úrslitin í Kríumótinu
1. sæti Böðvar Guðmundsson 5965 stig, 2. sæti Frímann Frímannsson 4908 stig, 3. sæti Guðjón Halldórsson 4073 stig, 4. sæti Steinþór Agnarsson 3621 stig, 5. sæti Guðni V. Sveinsson 3452 stig og 6. sæti Sverrir Gunnlaugsson 1359 stig.

Mikið flogið laugardaginn 19. maí - nýjar vélar í loftið daglega
Laugardaginn 19. maí kom loksins þokkalegt flugveður og líf og fjör færðist yfir Hamranesið. Steinþór og nýji Capinn er orðinn fastur liður á Hamranesi þegar viðrar til flugs. Kristján Antons mætti með Extruna, Friðrik með eina af sínum fjölmörgum nýju vélum, Böðvar með Big Lift, Guðmundur Kristinsson með Super Sportser 90 og fleiri. Einnig var önnur ef kennsluvélum Þyts gerð klár fyrir sumarið. Böðvar flaug Big Liftinum fallega í sínu fyrsta flugi, en því miður missti hann vélin eftir að festing fyrir vængstífu brotnaði og er þetta í annað sinn sem svona vél fer vegna galla í vængfestingu. Karl Hamilton kom með nýja Giles vél frá Flear og eftir smálagfæringar á verkstæðinu í Hafnarfirði fór hún í loftið seinnipartinn um daginn. Annað eins flugtak hefur ekki lengi sést, en hún tók 45% dýfu, síðan beint upp og eftir það nánast lárétt út á hlið. Karli tókst að ná henni í stóran sveig í átt að Keflavík og síðan í austur inn dalinn. Þá tók hún upp á því að rolla stjórnlaust á mikilfenglegan hátt. Steve reyndi að trimma vélina af fyrir hann, en uppgötvaði þá að hann flýgur eftir annari aðferð en Karl og þá tók Guðmundur formaður við og reyndi að trimma vélina. Þetta var eins og fylgjast með kvikmynd á hægum hraða og hvert andartak sem heil mínúta. Karl sló síðan af mótornum og náði þá tökum á vélinni, en litlu síðar drapst á mótornum. Hann flaug þá með fallegum tilþrifum hring í kringum svæðið og setti vélina í aðflug úr austri. Aðflugið var ekki með minni tilþrifum en þegar tekið var í loftið. Engu líkara var en vélin væri með hiksta því hún kom inn eftir fluglínu sem má einna helst líkja við öldugang. Þegar vélin var komin niður eftir þetta tilþrifamikla fyrsta flug í heilu lagi kom löng þögn hjá öllum viðstöddum. Ef að Karl hefði farið í læknisskoðun á þessari stundu hefði hann líklega verið greindur með parkingson veiki á háu stigi. Það verður að segjast eins og er að viðstaddir hafa líklega aldrei aukið adrenalínflæði sitt jafn mikið og þessi örfáu andartök sem voru eftirá eins og margir klukkutímar.

Kríumótið - hittast kl. 10:00 á laugardag við Álverið
Mæting á Kríumótið á laugardag 12. maí er á bílastæðinu við Álverið í Straumsvík kl 10:00.Veðurspá er nokkuð góð. Sunnudagurinn er þó hugsaður sem varadagur. Reiknað er með að mótið verði haldið á Höskuldarvöllum að venju. Farin var könnunarferð á Höskuldarvelli í gærkvöldi. Grasið er orðið sæmilega þurrt. Þarna eru í gangi einhverjar orkuframkvæmdir og liggur töluvert af rörum meðfram hlíðinni. Vegurinn er mjög góður. Muna þarf eftir kaffinu og því sem með því þarf.

Þrír stoltir með nýju vélina sína!

Vel heppnað vöfflumót, vinnudagur og "rólegur" fundur
Fjöldi aðila mætti á laugardagsmorgninum 5. maí á Hamranes og tók þátt í að skúra út flugstöðina. Pallurinn var háþrýstiþveginn, jafnað var úr hryggnum á veginum og sett upp bönd fyrir ofan bita á verönd flustöðvarinnar til að bægja frá fuglum. Sótt var vatn á vatnskútinn og settur nýr rafgeymir (sem Steinþór gaf) við ljósavélina. Pétur og Jóhannesbræður stóðu sig vel í vöfflubakstrinum og komu einnig með forláta kökur sem skreyttar voru með súkkulaðiflugvöllum. Fundurinn sem átti að vera kl. 14:00 breyttist í létt spjall um daglega hluti, því margir voru farnir fyrir þann fundartíma. Guðjón flaug svifflugu í hlíðinni norðan við flugstöðina og skemmtilegt að sjá hvað hann gerði þetta vel, því vindur var mikill. 

Fimmtudagsfundur færist fram á laugardaginn 5. maí kl. 14:00 á Hamranesi og þennan sama dag verður Vöfflumótið og vinnudagur
Fimmtudagsfundur sem átti að vera 3. maí færist yfir á laugardaginn 5. maí kl. 14:00. Þennan sama dag er skráð árlegt Vöfflumót og einnig verður vinnudagur undir umsjón Erlendar þennan sama laugardag. Á fundinum verður farið yfir stöðu mála varðandi viðhald á flugstöð og flugvelli á Hamranesi, kynnt verður framkvæmd á lisflugmótum sumarsins, Arnar og Steve sýna hugsanlega brot af nýju myndbandi frá 30 ára afmælisflughátíðinni á síðasta ári, farið verður yfir öryggismál á flugvelli og að lokum liðurinn önnur mál. Við hvetjum menn til að mæta snemma á laugardagsmorgninum og taka til hendinni í hreinsun, þrifum og að koma okkar glæsilegu aðstöðu á Hamranesi í gott stand fyrir sumarið.

Líf og fjör á Hamranesi - Vinnudagur laugardaginn 5. maí
Mikið var um að vera á Hamranesi miðvikudaginn 25. apríl. Nokkrir byrjuðu að fljúga strax eftir hádegi og síðan fjölgaði mikið seinnipartinn. Menn sáust nota nýstárlegar aðferðir við að draga svifflugu í loftið, en sett var band í hundinn hans Þrastar og hann látinn hlaupa með sviffluguna í loftið. Margar nýjar vélar eru að koma fram eftir veturinn og enn fleiri væntanlegar. Það stefnir í fjörugt sumar í módelflugi og veðrið verður vonandi ekki til þess að spilla fyrir. Jón Erlendsson flugvallarstjóri ætlar að reyna að fá hóp manna til að hjálpast að við að gera svæðið og húsið klárt fyrir sumarið og hefur þar nefnt laugardaginn 5. maí þegar vöfflumótið verður. Það verða allar græjur á staðnum til að þrífa húsið og einnig ætla Jón að fá lánaða háþrýstigræju (Sigurgeir ætlar að koma með sína) til að smúla pallinn. Best væri ef hægt væri að mæta snemma og ef góður hópur mætir þá tekur þetta ekki langan tíma. Hliðið ætlar Jón að reyna að gera við næstu daga og ef veður og græjur leyfa þá væri kannski hægt fríkka upp á það þennan laugardag sem þrifinn verða. Svo virðist sem staurinn með lásnum hafi gengið aðeins til og skekkst aðeins útá við og þar af leiðandi leggst aðalrörið á kassann og nær ekki í lásinn, einnig hefur svo brotnað einn flatjárnsbútur þannig að lásinn getur ekki opnað ef það læsist. Einnig verður kíkt á flugbrautina bráðum til að sjá hvaða möguleikar eru í boði og Jón hefur verið að afla mér upplýsinga um þau mál og tala við "sérfræðinga" á því sviði. Ef einhverjir vita um eitthvað sérstakt sem þarf að gera þá endilega látið Jón vita og  mætið og hjálpið til. Vatnsmálin eru í góðum höndum hjá Eggerti og mun hann sjá um það á næstunni að vatn verði á húsinu. Ef menn verða varir við eitthver vandamálc varðandi vatnið í sumar eru þeir vinsamlegast beðnir um að hafa samband við Jón eða Eggert beint.

Skemmtun, fræðsla, innkaup og fleira á tenglasíðu Þyts
Búið er að taka tenglasíðu Þyts í gegn og þar er að finna margar áhugaverðar heimsíður s.s. RC Exchange þar sem hægt er kaupa 37% Extru af Bob Godfrey   og 1/2 skala Piper Cup  á kr. 600.000. Einnig er þarna að finna marga aðila með "giant" flugmódel á góðu verði s.s. 2-2.5 metra vænghaf Extru, Sukoi eða Giles á kr. 40-60.000 tilbúnar og klæddar.

Bob Godfrey með Extruna   1/2 skala Piper Cup

Skemmtilegur og fræðandi félagsfundur
Þytur var með félagsfund í Garðaskóla 5. apríl s.l. og var hann vel sóttur. Björgúlfur Þorsteinsson fór yfir gerðir og útfærslur á flugvélum til að nota í listflugi. Einnig lýsti hann byrjunaræfingum og rammanum sem þarf að venja sig við að fljúga innan þegar verið er að fljúga listflug. Eftir fróðlega hluti frá Björgúlfi var sýnt myndvand með Quique Somenzini en hann er frá Argentínu og er meistari í TOC (Tournament of Champion) í Bandaríkjunun. Margir sem voru á fundinum höfðu á orði að þetta væri "feikað" myndband, en svo er ekki. Hann flýgur Laser vél sem hann og faðir hans hafa gert á nokkrar breytingar til að auka stöðugleika, en stöðugleiki vélarinnar og hæfni flugmannsins er ótrúleg. Hann nánast lendir vélinn lóðrétt og snertir völlinn með stélhjólinu. Hann hengir vélina á mótórinn og nánast færir yfir flugvöllinn sentimetra í einu og við brautarendann hengir hann vélina alveg á mótórinn og bakkar aftur eftir flugvellinum og snýr um leið vélinn rólegt "tork" roll. Hann veltir síðan vélinn hæga veltu á litlum hraða í um tveggja metra hæð eftir vellinum. Eftir myndbandið fór Guðmundur G. Kristinsson yfir listflugmótin sem verða í sumar, en þetta eru í raun ekki mót heldur verkleg kennsla í listflugi. Gert er ráð fyrir að reyndur listflugmaður taki í upphafi hvers móts nokkra æfingar og að því loknum muni þrír til fjórir reyndir listflugmenn verða flugmönnum til aðstoðar við að fara í gegnum sama prógram með eigin vélar. Í lok kennslunnar fara síðan þátttakendur í gegnum þetta prógram á eigin spýtur og dómnefnd dæmir æfingarnar. Fyrstu þrjú sætin gefa stig og á síðasta mótinu kemur í ljós hverjir verða bestu listflugmenn Þyts á árinu 2001. Farið var yfir mótaskrá sumarins og hún samþykkt. Á fundinn mættu fimm módelflugmenn frá Selfossi og samþykkti fundurinn að þeir kæmu sem félagar í Þyt, en mynduðu sérstaka Selfossdeild. Þeir sem ekki hafa flogið í þessum hópi verða teknir saman í sumar og fá kennslu í módelflugi. Félagsmenn voru hvattir til að aðstoða þessa áhugasömu ungum menn eins og kostur væri og þeir boðnir velkomnir í félagið. Nokkuð var rætt um ástandið á flugvelli félagsins og talið að gera þurfi lagfæringar á honum. Verið er að skoða möguleika á að fara með stórum titringsvaltara yfir brautirnar og einnig gæti þurft að berja niður nibbur á malbikinu. Jón Erlendsson er að skoða þessi mál með nefndarmönnum í flugvallarnefnd.

Félagsfundur verður fimmtudaginn 5. apríl í Garðaskóla.
Þytur verður með félagsfund í Garðaskóla Garðabæ fimmtudaginn 5. apríl kl. 20:00. Á dagskrá verður kennsla fyrir módelflugmenn sem vilja taka fyrstu skrefin í undirbúningi fyrir listflug. Þar má t.d. nefna æfingaáætlun, markmiðasetningu, byrjunaræfingar og fleira. Okkar ágæti listflugmaður Björgúlfur Þorsteinsson mun sjá um kennsluna. Eftir þessa kennslustund í listflugi verður sýnt myndband frá stórkostlegu módelflugi Quique Somenzini en hann er frá Argentínu og er meistari í TOC (Tournament of Champion) í Bandaríkjunun. Hver mundi trúa því að hægt væri að lenda flugmódeli lárétt!!! Látið þetta stórkostlega myndband ekki fram hjá ykkur fara. Mótaskráin verður tekin fyrir í síðasta sinn og endanlega gengið frá henni fyrir sumarið. Að lokum verður fjallað um inngöngu nokkurra góðra félaga frá Selfossi, en stefnt er að því að þeir komi inn sem hefðbundnir félagar með öll réttindi, en sem sér deild. Við hvetjum alla okkar félaga til að mæta og taka þátt í skemmtilegum og spennandi fundi.

Þytsfagnaðurinn var ein besta skemmtunin um áraraðir og Balsabandið sló í gegn sem ein besta danshljómsveit landsins.
Vel var mætt eða um 50 manns á fagnað Flugmódelfélagsins Þyts sem haldinn var í fallegum og hlýlegum sal á annarri hæð í verslunarmiðstöðinni á Seltjarnarnesi. Fólk fékk fordrykk við komu á staðinn og að því loknu var fram borið glæilegt hlaðborð með dýrindis réttum. Allir fengi síðan kaffi og sumir fengu sér koníak með því. Eftir borðahaldið var dregið í happdrætti þar sem Húsasmiðjan, Þröstur Gylfason og Pétur Hjálmarsson höfðu gefið glæsilega vinninga s.s. brauðrist, töfrasprota (fyrir karlmenn), módelljós, tösku undir fjarstýringu og módelhnífa. Eftir happdrættið tók Steinþór lagið Skýið (lag sem Björgvin Halldórsson gerði frægt) með hluta af Balsabandinu og var þetta glæsileg byrjun á frábæru kvöldi með Balsabandinu. Eftir sönginn mætti á staðinn eftir nokkra leit heimsfrægur gestasöngvari.sem var vægast sagt ekki með mjög aðlaðandi útlit. Hann söng lagið Spáðu í mig (lag sem Megas gerði frægt) með miklum tilþrifum og bar um leið nánast upp bónorð við nokkra aðila í salnum. Eftir þetta kynnti Guðmundur G. Kristinsson formaður nýjar reglur í lögum félagsins þar sem sett hefur verið á flug- og smíðaskylda á félagsmenn. Einnig að 10% tekna félagsmanna ættu í framtíðinni að renna til félagsins. Skipaður hefur verið læknir félagsins og kynnti Guðmundur nokkrar sjúkdómslýsingar á krónískum sjúkdómum flugmódelmanna.Gert var gaman að þessum nýju tímum sem framundan væru hjá félaginu. Átta flugmódelmenn settu saman módel á staðnum og kepptu síðan með þeim í "Pilon race" Vinningshafinn sem reyndist vera Þröstur Gylfason var sæmdur kapteinsnafnbót og krýndur orðu rússnesku flugmódelakademíunnar. Eftir þessar skemmtilegu uppákomur tók Balsabandi við kvöldinu, en í hljómsveitinni eru sjö meðlimir og af þeim hópi eru fjórir í stjórn félagsins. Veislugestir höfðu líklega ekki uppi miklar væntingar um þessa hljómsveit (hún kunni fjögur lög á árshátíðinni í fyrra), en það kom í ljós að að þetta er einhver mesta stuðhljómsveit samtímans. Þeir tóku rjómann af öllum bestu íslensku og erlendu lögum áranna 1960 til 1990 ásamt nokkrum yngri lögum. Dansgólfið var troðið allt kvöldið (það var tómt í pásunni) og fjölbreytnin í söngnum var mikil því söngvarar í hljómsveitinni voru fjórir alls. Þegar leið á kvöldið fór að koma vinir og kunningjar félagsmanna og skapaði það góða stemmningu. Hljómsveitin spilaði svo þétt að kvartað var frá íbúðum sem eru fyrir ofan salinn. Dansinn dunaði til klukkan fjögur og hefði líklega gert lengur ef hægt hefði verið. Við færum þessum frábæru tónlistarmönnum bestu þakkir fyrir eitt skemmtilegasta kvöld sem margir höfðu upplifað. Við sem fengum að njóta þessa frábæru kvöldstundar vorkennum þeim félagsmönnum sem sáu sér ekki fær að koma, en vonum að þeim gefist tækifæri til þess að ári liðnu.

Árshátíðin okkar verður á laugardaginn - Félagar eru hvattir til að mæta og taka með sér maka og gesti.
Árshátíð flugmódelfélagsins Þyts verður laugardaginn 17. mars n.k. á Sex Baujunni sem er veitingastaður við hliðina á Rauða ljóninu á Eiðistorgi, Seltjarnarnesi. Koniac stofan opnar kl. 18:00, en hún er á neðri hæðinni. Kl. 19:00 hefst borðhald og boðið verður upp á súpu og hlaðborð með heitum og köldum réttum. Eftir matinn verða uppákomur og dansinn stiginn með hinu heimsfræga Balsabandi. Margir hafa þegar skráð sig, en verðið er kr. 2750 fyrir manninn. Félagsmenn eru hvattir til að taka með sér maka og gesti.

Stórskemmtilegur og fræðandi félagsfundur 
Þriðji félagsfundur Þyts á árinu var haldinn í Garðaskóla fimmtudaginn 8. mars. Frekar döpur mæting var á fundinn fyrsta klukkutímann, en hópurinn var orðinn nokkuð stór þegar aðalefni kvöldsins, Norðurlandamótið í svifflugi var á dagskrá. Fyrst var kynnt árshátíð félagsins og flestir fundarmenn skráðu sig og gesti til þátttöku. Stefnir í að aðsókn verði góð og Balsabandið tryggir að þetta kvöld verður ógleymanlegt. Næst tók til máls Böðvar Guðmundsson með kynningu á norðurlandamóti í hangflugi á svifflugum. Þessi kynning tóks frábærlega og margir fundarmenn hafa í dag miklu betri sýn á það hversu skemmtilegt og gefandi svifflug getur verið. Sýndar voru vídespólur úr starfi Þyts, frá erlendum stórmótum í hangflugi og þar mátti m.a. sjá íslenska keppendur sem tóku þátt. Einnig var sýnt hvernig stýringar Tragi keppnissvifflugu virka og kom mörgum á óvart hversu fjölbreytta stjórnun er hægt að hafa á svifflugu. Böðvar sýndi hvernig hægt var að hafa hallastýri eftir öllum vængnum, flapsa eftir öllum vængnum eða vera með "butterfly" og snarstöðva svifflugu sem er á fullri ferð. Þessi kynning var einnig full af góðum húmor, skemmtilegum myndum frá vélflugi og fleiru. Jón Erlendsson kynnti breytingar á reglum um félagsgjöld og Pétur Hjálmarsson fór yfir mótaskrá sumarsins, sem er full af fjölbreyttum uppákomum. Mótaskráin er komin í hendur Arnars og mun hann setja hana inn á heimasíði félagsins á næstunni. Samþykkt var að vísa uppsetningu öryggisgrindar við flugvallarborð til stjórnar og þar verði tekin ákvörðun um mögulegt frármagn til framkvæmda. 

Næsti félagsfundur Flugmódelfélagsins Þyts verður í Garðaskóla fimmtudaginn 8. mars kl. 20:00.
Næsti félagsfundur flugmódelfélagsins Þyts verður í Garðaskóla Garðabæ fimmtudaginn 8. mars kl. 20:00. Á dagskrá er kynning á árshátíð Þyts og Balsabandsins þann 14. mars n.k., mótaskrá sumarsins, kynning á norðurlandamóti í svifflugi, kynning á félagsgjöldum samkvæmt lagabreytingum á síðasta ári, öryggisgrind og fleira. Félagsmenn eru hvattir til að fjölmenna.

Skemmtileg heimsókn í R/C World í Orlando og á stríðsflugvélasafn í Kissimee á Florida.
Formaður flugmódelfélagsins Þyts dvaldi í Orlanda Florida í tvær vikur og heimsótti að sjálfsögðu menn í nærliggjandi módelklúbbi í þessu mekka módelmanna sem er á Flórída. Á svæðinu voru margar verslanir og fjöldi módelklúbba, en verðlag á módelvörum var svipað og hjá Þresti (miklu betra að kaupa heima). Einn af þessum klúbbum sem var heimsóttur var R/C World, en hann er rétt norðan við Orlando flugvöllinn. Þar er gott flugsvæði með malbikuðum brautum, góðu klúbbhúsi og vatni fyrir vatnaflug. Fjöldi félagsmanna er um 100 og meðalaldur þeirra er 71 ár. Klúbburinn hefur þá sérstöðu að eiga mikið landsvæði (130 ekrur) og hefur meðal annars selt hluta af sínu svæði undir íbúabyggð og aðalgatan í því hverfi heitir R/C World gata. Flestir félagsmenn eru hlutahafar og kostar það um kr. 200.000 að gerast hluthafi. Hægt er að fá heimild til flugs sem aukafélagi fyrir um kr. 26.000 á ári. Þessi völlur er mikið notaður til æfingaflugs hjá þátttakendum í TOC keppninni (Tournament of Champion). Eftir að hafa heimsótt þennan klúbb fer maður ósjálfrátt að bera saman aðstöðu þar og hjá okkur heima. Við erum með aðstöðu sem er með því besta sem til er og það kostar yfirleitt miklu minna fyrir okkur að njóta hennar en víðast annarsstaðar. Einnig var heimsótt strísflugvélasafn í Kissimee sem er rétt sunnan við Orlando flugvöll og skemmtilegt að sjá þar margar góðar vélar úr seinni heimstyrjöldinni. Þar er einnig hægt að fljúga (alvöru, sjá mynd) tveggja manna vél úr seinni heimstyrjöldinn (með aðstoðarflugmanni fyrir aftan) og ekki talin þörf á reynslu úr flugi til að gera skemmtilegar listflugsæfingar eða fara í flugslag (combat). 

Félagsmenn varkárir varðandi kaup á húsnæði og árshátíðin með Balsabandinu verður 10. eða 17. mars n.k.
Á félagsfundi 1. febrúar voru kynntar hugmyndir um kaup á húsnæði í Hafnarfirði undir smíðaaðstöðu, fundastarf og námskeiðahald. Viðbrögð fundarmanna voru þau að flestir eru varkárir og vilja fá nákvæmar tölur um kostnað og skuldbindingar til að geta myndað sér skoðun á málinu. Þetta er mjög gott vegna þess að ekki má flana að neinu sem gæti síðan verið erfitt að losna frá. Verið er að skoða nákvæmar tölur yfir verð með millilofti, stiga og milliveggjum ásamt kostnaði við raf- og pípulagnaefni, borð, innréttingar á kaffistofu, gólfefni og fleira. Þetta verður tekið fyrir aftur á næsta fundi og þá tekin ákvörðun um hvort skipa eigi í nefnd eða leggja þetta alveg til hliðar. Rætt var um öryggisgrind við smíðaborð á flugvelli og fannst mönnum að taka þyrfti upp aftur tillögur að öryggisreglum fyrir völlin og samþykkja þær á félagsfundi. Ákveðið var að ræða öryggismálin betur á næsta fundi. Böðvar kynnti mótsreglur að einföldu en skemmtilegu lisflugmóti og ákveðið var að nota þær á móti í sumar. Birgir kom með skemmtilega útfærslu á flóknara listflugskerfi sem hann setti saman sjálfur á sínum tíma og stefnt er að því að vera með þetta kerfi á einu móti í sumar. Steinþór kom síðan og kynnti væntanlega árshátíð með Balsabandinu sem verður annaðhvort 10. eða 17. mars. Samkvæmt skoðanakönnun á fundinum er mikill áhugi fyrir þessu og ákveðið var að allir gætu tekið með sér gesti utan félagins (ásamt maka). Félagsmenn ættu að fjölmenna á þennan skemmtilega viðburð sem mun örugglega lyfta upp félagslífinu hjá okkur.

Annar félagsfundur Flugmódelfélagsins Þyts á árinu 2001 verður í Garðaskóla Garðabæ fimmtudaginn 1. febrúar kl. 20:00
Annar félagsfundur ársins verður í Garðaskóla 1. febrúar kl. 20:00. Á dagskrá er kynning á hugmyndum um að félagið kaupi húsnæði undir félagsheimili (smellið hér til að sjá teikningar og aðrar upplýsingar), smíðavinnu, fundi og námkeiðahald, sett verði öryggisgrind fyrir framan flugborð á Hamranesi, létt og skemmtilegt listflugmót kynnt og Balsabandið kynnir væntanlegt bjórkvöld.

Viljum við efla félagsstarfið og koma upp félagsheimili með aðstöðu fyrir smíðavinnu, námskeiðahald og fundastarf?
Félagar í Þyti hafa framkvæmt ótrúlega stóra hluti : Þeir sem þekkja söguna vita að félagar í Flugmódelfélaginu Þyti hafa komið mörgum stórum hlutum í framkvæmd og má þar t.d. nefna flugvöllinn og flugstöðvarhúsið á Hamranesi og tæki sem þar eru til staðar. Þessi verkefni eru ótrúleg þegar litið er til þess að félagsmenn voru ekki nema öðru hvoru megin við hundraðið á þeim tíma sem þessu var komið upp.

Mikill áhugi og góð aðstaða til flugs á sumrin:   Á fyrsta félagsfundi Þyts í upphafi tuttugustu og fyrstu aldar var metmæting og greinilegt að aukin nýliðun síðustu ára er að skila sér. Það er því áríðandi að vera vakandi og taka vel á móti nýrri kynslóð módelmanna. Þeir koma til með að njóta framtaks eldri félaga á frábærri aðstöðu á Hamranesi við flug á sumrin.

Ættum við að byggja upp betra vetrarstarf:   Það sem vantar er að geta komið upp félagsheimili hjá Flugmódelfélaginu Þyti þar sem eldri módelmenn geta smíðað saman að staðaldri, þeir nýju leigt smíðaaðstöðu til bráðabyrgða og hægt væri að vera með funda- og námskeiðahald af ýmsu tagi. Vísir að þessu hefur verið í Hafnarfirði þar sem tíu aðilar hafa í nokkur ár leigt saman aðstöðu. Ég smíða sjálfur heima, en vantar aðstöðu fyrir stærri vélar og einnig að geta nýtt mér reynslu og þekkingu okkar frábæru eldri módelsmiða.

Komið að næstu kynslóð: Það er kannski komið að næstu kynslóð módelmanna að sýna að þeir geti lyft grettistaki eins og þeir sem stóðu fyrir uppbyggingu á Hamranesi. Ef einhver áhugi og vilji er til að koma upp félagsheimili er sá möguleiki ekki svo fjarlægur, heldur raunverulega mögulegur.

Raunhæft dæmi um kaup á húsnæði: Sem dæmi um þetta mætti nefna 140 fm. húsnæði við Hvaleyrarbraut 41 í Hafnarfirði sem er til sölu á kr. 65.000 á fm. Þetta húsnæði er með lofthæð upp á 4.50 m og því hægt að byggja milliloft og hafa tvær hæðir sem væru þá hvor með um 2.10 m lofthæð. Með þessu væri komið húsnæði á tveimur hæðum sem væru 280 fm að stærð.

Ef þetta húsnæði væri keypt á láni til 30 ára væri greiðslubyrði (miðað við 8% vexti og 4% vísitölu) um kr. 950.000.- á ári og rekstrarkostnaður um kr. 200.000 á ári. Gera mætti ráð fyrir að um 200.000 kæmi í tekjum af námskeiðahaldi (mjög vægt reiknað) og þá stendur eftir kr. 950.000.- eða kr. 79.000 á mánuði. Til að þetta gangi upp þarf aðeins 25 aðila til að leiga pláss og greiða (hver) kr. 3200 á mánuði (kr. 3800 ef ekki væru tekjur af námskeiðshaldi). 

Jafnvel hægt að vinna fyrir mánaðargjaldinu!: Þessir 25 aðilar hefðu hag af því að bjóða sig fram í vinnu við námskeiðahald (gæti jafnvel unnið fyrir leigunni). Framkvæmdin á þessu yrði að vera fyrir utan félagið (eins og allar stærri framkvæmdir fyrr á árum) og stofna þyrfti líklega sérstakt hlutafélag um kaupin á húsnæðinu. Þeir 25 aðilar sem gerðust hluthafar myndi kjósa sér stjórn til að sjá um kaup og rekstur á húsnæðinu. Ef einhver vildi eða yrði að slíta sig úr þessu samstarfi þyrfti hann að selja öðrum módelmanni sitt hlutabréf og um leið skuldbindinguna til að greiða áfram kr. 2700 á mánuði í leigu. Í raun væru þátttakendur í þessum hópi að kaupa 4% hlut í húsinu og skuldbinda sig til að greiða kr. 2700 á mánuði í 30 ár eða þangað til að hann seldi sinn hlut.

Fastur 25 manna kjarni kominn: Það besta er að með samstarfi sem þessu er verið að byggja upp 25 manna kjarna sem alltaf verður til staðar (ef einhver selur, þá kemur annar í staðinn).  Vetrarstarfið mundi vafalaust eflast, möguleiki yrði á fjölbreyttu námskeiðahaldi og byrjendur í smíði gætu lært af þeim sem hafa meiri reynslu og þekkingu.

Þytur eignist húsið eins og Hamranesið: Eins og var um aðstöðuna á Hamranesi, þá væri skemmtilegast að geta eftir einhvern tíma afhennt Flugmódelfélaginu Þyti húsnæðið til eignar. Með slíku mundi starfsemi félagsins verða fastmótum um alla framtíð og eftir 20 til 30 ár hægt að tala um eitt kraftaverkið í viðbót sem þessum ótrúlegu Þytsmönnum hefði tekist að afreka.

Ég óska eftir umræðu um þetta málefni og set mig sem fyrsta aðila á skrá yfir þá sem vilja skuldbinda sig til að taka þátt í svona verkefni. Fyrir um ári síðan undirrituðu um 20-25 manns sig á lista þar sem þeir lýstu yfir vilja til að mál sem þetta væri skoðað nánar. Nú er tækifærið komið og ég óska eftir að þið takið þátt í umræðunni á póstlistanum og sendið mér tölvupóst með nafni, heimilsfangi, síma og tölvupóstfangi á kolaport@islandia.is ef þið hafið áhuga á að taka þátt í þessu verkefni.

Guðmundur G. Kristinsson , Kársnesbraut 85 , 200 Kópavogur - Símar 5542684/5625030/8931701

Fyrsti félagsfundur Flugmódelfélagsins Þyts sló öll met í aðsókn! Aukin flughæfni félagsmanna er málefni ársins 2001
Hátt í 40 manns mættu á fyrsta félagsfund ársins og er þetta ein besta mæting um árabil. Mörg ný andlit voru mætt og góðir gestir frá Suðurnesjum, Selfossi og víðar. Jón V. Pétursson fór yfir síðasta blómaskeið módellistflugs á Íslandi sem var fyrir 15-20 árum. Þá voru haldin íslandsmót á hverju ári samkvæmt FAI reglum og sérhönnuð íslensk "pattern" vél var raðsmíðuð í 13 eintökum. Hann og Björgúlfur Þorsteinsson fóru síðan yfir FAI flugferla í listflugi frá þessum tíma og Björgúlfur kynnti síðan þá þróun sem orðið hefur í þessu síðasta áratuginn. Gerð var skoðanakönnun á áhuga fundarmanna um aukna flughæfni og þátttöku í listflugmótum sem viðráðanleg væru fyrir flesta módelflugmenn. Það má segja að nánast allir á fundinum hefðu rétt upp hendi og lýst áhuga á þróun í þessum málum. Björn Svavarsson og Ágúst Bjarnason lýstu sínum hugmyndum og sýn á hvernig hægt væri að hafa listflugmót þannig að fleiri myndu taka þátt í þeim. T.d. að hafa forgjafarkerfi (sem byggja mætti á getumælingu samkvæmt stigakerfi) samkvæmt getu, vera með mismunandi keppnisflokka og fleira. Guðmundur G. Kristinsson formaður félagsins lagði fram tillögu frá stjórn að nýju stigakerfi til að mæla getu og stöðu hvers módelflugmanns. Ákveðið var að menn skoðuðu þetta stigakerfi og kæmu á næsta fund með tillögur til breytinga og athugasemdir. Guðmundur kynnti einnig að sett hefðu verið þrjú listflugmót á dagskrá í sumar, fyrsta í júni, annað í júlí og það þriðja í ágúst. Einnig væri stefnt að því að bjóða upp á bóklegt listflugnámskeið í vor og verklega og munnlega kennslu á Hamranesi í sumar. Ágúst mætti með fallega Cap lisflugvél og Böðvar var með tvær gamlar "pattern" vélar Calm og Supra Star, en gaman var að sjá þarna mun á kynslóðum í módelum sem notuð hafa verið í módellistflugi. Þeir nefndarformenn sem voru á staðnum fengu afhent erindisbréf vegna sinna starfa fyrir félagið árin 2000 til og með 2001. Greinilegt er að ekki þarf að kvarta undan áhuga félagsmanna í byrjun nýrrar aldar og því bjartar vonir til þess að þetta ár verði blómlegt í starfi félagsins. 

Tillaga að nýju stigakerfi í módelflugi verður lögð fram á félagsfundi Þyts fimmtudaginn 11. janúar.
Á síðasta ári var mikið rætt um að setja upp stigakerfi í módelflugi þar sem módelflugmenn gætu fengið mat á sinni stöðu og getu á hverjum tíma. Stjórn félagsins hefur ákveðið að leggja fram tillögu að slíku stigakerfi á félagsfundi þann 11. febrúar. Þetta stigakerfi er tekið úr gömlum gögnum hjá félaginu og talið að höfundur sé Guðjón Ólafsson (ef einhver veit betur má láta stjórnarmenn vita). Þetta stigakerfi er hægt að skoða með því að smella hér.

Fyrsti félagsfundur Flugmódelfélagsins Þyts verður í Garðaskóla Garðabæ fimmtudaginn 11. janúar kl. 20:00
Fyrsti félagsfundur ársins verður í Garðaskóla 11. janúar kl. 20:00. Á dagskrá er kynning á listflugskeppnum flugmódela með  nýju fyrirkomulagi. Ekki hefur verið keppt í listflugi (samkvæmt reglum FAI) í nokkur ár og sumir segja að þær keppnir séu erfiðar, fáir sem geti tekið þátt og að þessar keppnir séu ekki nógu skemmtilegar fyrir áhorfendur. Fyrsti félagsfundur nýrrar aldar verður því helgaður umræðu og kynningu á nýjum hugmyndum um skemmtilega útfærslu á listflugi þar sem flestir hafa möguleika á að taka þátt. Til að fá nýja fleti á þessu skemmtilega þætti í módelflugi ætlum við að fá Jón V. Pétursson til að segja frá gömlu góðu FAI keppnunum, Björgúlfur Þorsteinsson til að kynna nútimaframvæmd slíkra keppna  og Ágúst Bjarnason og Björn Svavarsson til að koma með nýjar hugmyndir um skemmtilega útfærslur á flugkomum- og keppnum.í módellistflugi í sumar. Nokkrar gamlar patternvélar og nýlegar skala listflugvélar verða á staðnum og einnig sýnt gott myndband fyrir þá sem vilja læra að fljúga öðruvísi en lárétt. Skemmtilegt spjall var í haust á póstlistanum um þesssa hluti og hægt að sjá þá umræðu með því að smella hér. Við hvetjum alla félagsmenn til að mæta og taka þátt í umnræðu um nýja stefnumótun í módellistflugi nýrrar aldar.