Hugmyndir um félagsheimili með aðstöðu fyrir smíðavinnu, námskeiðahald og fundarstarf.

Félagar í Þyti hafa framkvæmt ótrúlega stóra hluti

Þeir sem þekkja söguna vita að félagar í Flugmódelfélaginu Þyti hafa komið mörgum stórum hlutum í framkvæmd og má þar t.d. nefna flugvöllinn og flugstöðvarhúsið á Hamranesi og tæki sem þar eru til staðar. Þessi verkefni eru ótrúleg þegar litið er til þess að félagsmenn voru ekki nema öðru hvoru megin við hundraðið á þeim tíma sem þessu var komið upp.

Mikill áhugi og góð aðstaða til flugs á sumrin

Á fyrsta félagsfundi Þyts í upphafi tuttugustu og fyrstu aldar var metmæting og greinilegt að aukin nýliðun síðustu ára er að skila sér. Það er því áríðandi að vera vakandi og taka vel á móti nýrri kynslóð módelmanna. Þeir koma til með að njóta framtaks eldri félaga á frábærri aðstöðu á Hamranesi við flug á sumrin.

Ættum við að byggja upp betra vetrarstarf

Það sem vantar er að geta komið upp félagsheimili hjá Flugmódelfélaginu Þyti þar sem eldri og yngri módelmenn geta smíðað saman að staðaldri, nýir aðilar leigt smíðaaðstöðu til bráðabyrgða og hægt væri að vera með funda- og námskeiðahald af ýmsu tagi. Vísir að þessu hefur verið í Hafnarfirði þar sem tíu aðilar hafa í nokkur ár leigt saman aðstöðu. Margir smíða heima, en vantar aðstöðu fyrir stærri vélar, aðrir hafa enga aðstöðu heima og allir vildu geta nýtt sér meira reynslu og þekkingu okkar frábæru eldri módelsmiða.

Komið að næstu kynslóð

Það er kannski komið að næstu kynslóð módelmanna að sýna að þeir geti lyft grettistaki eins og þeir sem stóðu fyrir uppbyggingu á Hamranesi. Ef einhver áhugi og vilji er til að koma upp félagsheimili er sá möguleiki ekki fjarlægur, heldur raunverulega mögulegur.

Raunhæft dæmi um kaup á húsnæði

Sem dæmi um þetta mætti nefna 280 fm. húsnæði við Hvaleyrarbraut 41 í Hafnarfirði sem er til sölu á kr. 80.000 á fm. Þetta húsnæði er á tveimur hæðum, neðri hæðin með um 2.20 m lofthæð og efri með 4.72 m lofthæð (hægt að geyma í loftinu). Með þessu væri komið húsnæði á tveimur hæðum sem væri samtals um 280 fm að stærð. Bílastæði eru sameiginleg fyrir allt húsið og eru 20 samtals. Þar sem þau væru einungis í notkun fyrir atvinnustarfsemi á daginn væru þau öll laus á kvöldin og um helgar.

Verð á húsnæði með millilofti og stiga:             11.200.000,-

Rafmagn, pípulögn og innréttingar:                       800.000,-

Samtals                                                                  12.000.000,-

Ef þetta húsnæði væri keypt á 100% jafngreiðsluláni (eitt lán frá seljanda) til 30 ára væri greiðslubyrði (miðað við 8% vexti og 4% vísitölu) um kr. 970.000.- á ári og rekstrarkostnaður um kr. 300.000 á ári (hiti og rafmagn). Gera mætti ráð fyrir að um kr. 450.000 kæmi í tekjur af námskeiðahaldi og þá stendur eftir kr. 820.000.- ári eða kr. 68.000 á mánuði. Til að þetta gangi upp þarf 30 aðila til að leiga pláss og greiða (hver) kr. 2300 á mánuði (kr. 3500 á mánuði ef ekki væru tekjur af námskeiðshaldi).

Gert ráð fyrir samtals um 9 fm á aðila!

Í þessu húsnæði væri gerð ráð fyrir tveim smíðasölum á efri hæð með aðstöðu fyrir samtals 20 manns og einum smíðasal á neðri hæð með 10 aðilum. Þar fyrir utan er gert ráð fyrir sameiginlegu svæði með kaffistofu, WC og geymslu upp á um 70 fm. Það er því gert ráð fyrir 7 fm á persónulegu svæði smíðaaðila og 2.3 fm í sameiginlegu rými sem einnig yrði notað fyrir námskeiðahald.

Jafnvel hægt að vinna fyrir mánaðargjaldinu!

Þeir 30 aðilar sem stæðu saman að þessu verkefni hefðu hag af því að bjóða sig fram í vinnu við námskeiðahald (gætu jafnvel unnið fyrir leigunni). Þar ná nefna nýliðanámskeið í smíði, bókleg nýliðanámskeið í flugi, framhaldsnámskeið í smíði, framhaldsnámskeið í flugi, lisflugsnámskeið fyrir byrjendur, listflugsnámskeið fyrir lengra komna og fleira.

8 námskeið x 15 manns x  5000 =        kr. 600.000,-

Kostnaður (annar en kennsla)           kr. 150.000.-

Hagnaður                                              kr. 450.000,-

Framkvæmdin á þessum kaupum yrði að vera fyrir utan Flugmódelfélagið Þyt (eins og allar stærri framkvæmdir fyrr á árum) og stofna þyrfti líklega sérstakt hlutafélag um kaupin á húsnæðinu. Þeir 30 aðilar sem gerðust hluthafar myndi kjósa sér stjórn til að sjá um kaup og rekstur á húsnæðinu. Ef einhver vildi eða yrði að slíta sig úr þessu samstarfi þyrfti hann að selja öðrum módelmanni sitt hlutabréf og um leið skuldbindingar sem því fylgja s.s. greiðslu mánaðarlegs gjalds vegna síns hlutabréfs. Í raun væru þátttakendur í þessum hópi að kaupa 3.33% hlut í húsinu og skuldbinda sig til að greiða kr. 2700 á mánuði í 30 ár eða þangað til að viðkomandi seldi sinn hlut. Allar skuldbindingar yrðu að vera á kreditkortasamningum eða sambærilega tryggðu greiðsluformi þannig að vanskil yrðu ekki.

Fastur 30 manna kjarni kominn

Það besta er að með samstarfi sem þessu er verið að byggja upp 30 manna kjarna sem alltaf verður til staðar (ef einhver selur, þá kemur annar í staðinn).  Vetrarstarfið mundi vafalaust eflast, möguleiki yrði á fjölbreyttu námskeiðahaldi og byrjendur í smíði gætu lært af þeim sem hafa meiri reynslu og þekkingu.

Þytur eignist húsið eins og Hamranesið

Eins og var um aðstöðuna á Hamranesi, þá væri skemmtilegast að geta eftir einhvern tíma afhennt Flugmódelfélaginu Þyti húsnæðið til eignar. Með slíku mundi starfsemi félagsins verða fastmótum um alla framtíð og eftir 20 til 30 ár hægt að tala um eitt kraftaverkið í viðbót sem þessum ótrúlegu Þytsmönnum hefði tekist að afreka.

Ég óska eftir umræðu um þetta málefni og set mig sem fyrsta aðila á skrá yfir þá sem vilja skuldbinda sig til að taka þátt í svona verkefni. Fyrir um ári síðan undirrituðu um 20-25 manns sig á lista þar sem þeir lýstu yfir vilja til að mál sem þetta væri skoðað nánar. Nú er tækifærið komið og ég óska eftir að þið takið þátt í umræðunni á póstlistanum og sendið mér tölvupóst með nafni, heimilsfangi, síma og tölvupóstfangi á kolaport@islandia.is ef þið hafið áhuga á að taka þátt í þessu verkefni.

Guðmundur G. Kristinsson , Kársnesbraut 85 , 200 Kópavogur , Símar 5542684/5625030/8931701